एनआरएन डेभलपमेन्ट फन्डको रकम जुट्न सुरु «

एनआरएन डेभलपमेन्ट फन्डको रकम जुट्न सुरु

पूर्वाधार तथा उत्पादनशील क्षेत्रमा लगानी गर्ने गरी १० अर्ब रुपैयाँ पुँजी भएको एनआरएन नेपाल डेभलपमेन्ट फन्डको रकम जुटाउने प्रक्रिया सुरु भएको छ ।
जसअनुरुप सस्ंथापक सेयरधनीको लागि प्रथम चरणको आह्वान गरिएको फन्डका प्रमुख कार्यकारी अधिकृत अनलराज भट्टराईले बताए । त्यसपछि दोस्रो चरणमा पनि संस्थापक थपिनेछन् र त्यसपछि मात्र प्राथमिक निष्कासनमा जाने उनले बताए ।
२०७५ सालमा सम्पन्न लगानी सम्मेलनमा नेपाल सरकारका तर्फबाट लगानी बोर्डका तत्कालिन प्रमुख कार्यकारी अधिकृत महाप्रसाद अधिकारी तथा गैरआवासीय नेपाली संघका तत्कालीन अध्यक्ष भवन भट्टले समझदारीपत्रमा हस्ताक्षर गरेका थिए । जसअनुरुप सरकारको ५० करोड रुपैयाँ सेयर लगानीसहित गैरआवासीय नेपाली प्रवद्र्धक रहेको कम्पनीमा करिब साढे २ अर्ब रुपैयाँको वैदेशिक मुद्रामा लगानी प्राप्त भइसकेको छ ।
पहिलो चरणको आह्वानअनुरुप नै गैरआवासीय नेपाली संघका निवर्तमान अध्यक्ष भवन भट्टले १० करोडको संस्थापक सेयर हाल्ने प्रतिबद्धता जनाइसकेका छन् । भट्टराईका अनुसार गैरआवासीय नेपालीले विदेशी मुद्रामा नै लगानी गर्ने कार्यका लागि सरकारले सहजीकरण गर्ने भएको छ ।
हाल एनआरएन नेपाल डेभलमेन्ट फन्डमा गैरआवासीय नेपालीको ९ अर्ब ५० करोड रुपैयाँ र नेपाल सरकारको ५० करोड रुपैयाँ सेयर लगानी हुने जनाइएको छ । तर यो फन्ड १० अर्बमा सीमित नहुने पनि फन्डका अध्यक्ष उपेन्द्र महतोले बताएका छन् । प्रथम तथा दोस्रो चरणको संस्थापक रकम संकलनपछि गैरआवासीय नेपालीलाई लक्षित गरी प्राथमिक सेयर (आईपीओ) निष्काशन गरिने योजना भएको उनले बताए । जसअनुसार ८ अर्ब रुपैयाँबराबरको साधारण सेयर आउनेछ । संघले यसअघि नै फन्डको लगानी नेपालका कृषि, पर्यटन र पूर्वाधारसँग सम्बन्धित परियोजनामा गर्ने जनाइसकेको छ । उनका अनुसार नेपाल सरकारले ५ प्रतिशत, १५ प्रतिशत संस्थापक र बाँकी ८० प्रतिशत पुँजी साधारण सेयर जारी गरी संकलन गरिने छ ।
प्राथमिक निष्कासन गैरआवासीय नेपालीले मात्रै खरिद गर्न पाउनेछन् । संघले प्रारम्भिक अवधिमा १० अर्ब रुपैयाँ लगानी नेपाल भित्र्याए पनि लगानी बढाउँदै लगेर १ खर्ब पु¥याउने लक्ष्य राखेको छ ।

प्रतिक्रिया दिनुहोस्