चलचित्र क्षेत्रले भोगिरहेको समस्याबारे सरकार जानकार «

चलचित्र क्षेत्रले भोगिरहेको समस्याबारे सरकार जानकार

परराष्ट्रमन्त्री प्रदीपकुमार ज्ञवालीले कोभिड–१९ का कारण चलचित्र क्षेत्रले भोगिरहेको समस्याबारे सरकार जानकार रहेको बताए ।
शुक्रबार काठमाडौंमा ‘नेपाल–अफ्रिका फिल्म फेस्टिभल, २०२१’ को उद्घाटन गर्दै परराष्ट्र मन्त्री ज्ञवालीले कोभिड–१९ को कारण नेपाली चलचित्र क्षेत्रमा परेको प्रभावको बारेमा सरकारलाई जानकारी रहेको र यस क्षेत्रलाई पुर्नबहाली गर्न सरकारले विभिन्न ढङ्गले प्रयासहरू पनि गरिरहेको बताए । सरकारले नेपाली चलचित्रहरूको अन्तर्राष्ट्रियकरण गर्न विदेशमा नेपाल फिल्म भेस्टिभल आयोजना गर्ने विषयमा छलफल गर्ने बताए । उनले भने, ‘कोभिडले पारेको असर नेपालको फिल्म क्षेत्रले कसरी भोगिरहेको छ भन्ने बारेमा सरकार जानकार छ । यो क्षेत्रलाई कसरी रिभाइभ गर्न सकिन्छ, फिल्म निर्माता, कलाकार, हल सञ्चालक, प्राविधिकहरू, हजारौँ फिल्म उद्योगमाथि आश्रित हुनुहुन्छ । उहाँहरूलाई परेको कठिनाइका बारेमा सरकारलाई जानकारी छ । त्यसका निम्ति विभिन्न ढङ्गले हामीले प्रयासहरूपनि गरिरहेका छौँ । नेपाली फिल्महरूको अन्तर्राष्ट्रियकरण गर्ने, फेस्टिभलको माध्यमबाट अन्तर्राष्ट्रिय क्षेत्र, मञ्चहरूबाट प्रदर्शित गर्ने विषयमा कसरी अगाडी बढ्न सकिन्छ, नेपाल फिल्म भेस्टिभल कसरी आयोजना गर्न सकिन्छ अन्तर्राष्ट्रिय रुपमा, हामी छलफल गर्नेछौं ।’
शुक्रबारदेखि काठमाडौंस्थित राष्ट्रिय नाच घरमा नेपाल अफ्रिका फिल्म फेस्टिभल सुरु भएको हो । फेस्टिभल वैशाख १२ गतेसम्म चल्नेछ । नेपाल अफ्रिका फिल्म फेस्टिभलकी निर्देशक मञ्जु मिश्रले ५४ वटा अफ्रिकि देशहरूको प्रतिनिधित्व फिल्म फेस्टिभलमार्फत गर्न खोजिएको बताए । फिल्म फेस्टिभलमा नेपाली फिल्महरूपनि प्रदर्शन गरिने उनले बताए । नेपाल र अफ्रिकाबीचको दुरी घटाउँदै अफ्रिकिहरूको जीवनस्तर, सामाजिक परिवेश, संस्कृति र रहनसहन बुझ्नका लागि यस फिल्म भेस्टिभलले सहयोग गर्ने पनि बताए ।
चलचित्र निर्माता संघका अध्यक्ष आकाश अधिकारीले नेपाल अफ्रिका फिल्म फेस्टिभलले नेपाल र अफ्रिकाबीचको रहनसहन, भाषा, सभ्यतालाई नजिक बनाउने बताए । दुई देशबीचको मित्रतालाई अघि बढाउन मद्दत पुग्ने पनि बताए ।
अधिकारीले विदेशमा छरिएर रहेका नेपालीहरूले पनि नेपाली फिल्म फेस्टिभल गर्ने कुराको प्रतिक्षामा रहेको बताउनुभयो । छिटोभन्दा छिटो नेपाली सिनेमाहरू पनि विश्वभर पुग्नेमा आफू आशावादी रहेको अधिकारीले बताए ।

प्रतिक्रिया दिनुहोस्