पर्यटन लगानी सम्मेलन आवश्यकः रेग्मी «

पर्यटन लगानी सम्मेलन आवश्यकः रेग्मी

नेपाल पर्यटन बोर्डका प्रमुख कार्यकारी अधिकृत डा. धनन्जय रेग्मीले नेपालमा पर्यटन क्षेत्रको विकासका लागि बाह्य लगानी भित्र्याउन छुट्टै लगानी सम्मेलन गर्नुपर्ने बताएका छन् ।
संघीय संसदको प्रतिनिधिसभा अन्र्तगत अन्तर्राष्ट्रिय सम्बन्ध समितिको बिहीबारको बैठकमा पर्यटन बोर्डको योजना सम्बन्धमा भएको छलफलमा प्रमुख कार्यकारी अधिकृत रेग्मीले मध्य पहाडी भूभागलाई हिल स्टेसनको रुपमा विकास गर्नका लागि ‘पर्यटन लगानी सम्मेलन’ गर्नुपर्ने बताए ।
यस्तो लगानी सम्मेलनमार्फत पर्यटन क्षेत्रमा वैदेशिक लगानी ल्याउन सकिने उनले बताए । उनले औद्योगिक व्यवसाय ऐन र नेपाल राष्ट्र बैंकको सर्कुलरमा पर्यटन क्षेत्रसँग सम्बन्धित स–साना पूर्वाधार निर्माणका लागि हुने खर्चलाई संंस्थागत समाजिक उत्तरदायित्व अन्तर्गत राख्ने व्यवस्था गर्नुपर्ने बताए । यस्तो हुन सकेमा पर्यटन बोर्डले कर्पोरेट संस्थाहरुसँग मिलेर धेरै काम गर्न सक्ने प्रमुख रेग्मीको भनाइ थियो ।
यस्तै पर्यटकीय क्षेत्रहरुको प्रचार प्रसारका लागि नेपालमा विदेशी फिल्म निर्माण गर्न दिने नीति निर्माण गर्नुपर्ने पनि उनले बताए । विदेशी फिल्महरुबाट नेपालका पर्यटकीय क्षेत्रहरुको प्रचारप्रसार सहज हुने भएकाले त्यस्ता फिल्म सुटिङ गर्न दिनका लागि एकद्धार नीति अवलम्बन गर्नुपर्ने, ड्रोन र क्यामेराको आयातमा सहज गराउनुपर्ने, ट्याक्स डिपोजिटमा सहज बनाइदिनु पर्ने र सुरक्षाको प्रबन्ध मिलाउने गरी नीति निर्माण हुन सके धेरै फिल्महरु नेपालमा बन्ने र त्यसबापत नेपालको पर्यटकीय क्षेत्रको प्रचार प्रसार हुने उनले बताए ।
पर्यटकलाई सहज हुने गरी देशका विभिन्न स्थानमा सार्वजनिक शौचालयको व्यवस्था गरिनुपर्नेमा पनि प्रमुख कार्यकारी अधिकृत रेग्मीले जोड दिए ।
देशका विभिन्न स्थानमा २५ सय भन्दाबढी पेट्रोलपम्प रहेको र उनीहरुमार्फत समाजिक उत्तरदायित्व अन्तर्गत सार्वजनिक शौचालय निर्माण र व्यवस्थापन गराउने नीति लिँदा राम्रो हुने उनले बताए । यस्तै पर्यटकका लागि सूचना दिनेगरी देशभरका बसपार्कमा नमस्ते सेन्टर स्थापना गर्नुपर्ने आवस्यकता रहेको पनि रेग्मीले बताए ।

प्रतिक्रिया दिनुहोस्