कांग्रेस मध्यावधि निर्वाचनको पक्षमा जान सक्ने डा. महतको संकेत «

कांग्रेस मध्यावधि निर्वाचनको पक्षमा जान सक्ने डा. महतको संकेत

वीरगन्ज– नेपाली कांग्रेसका समहामन्त्री डा. प्रकाशसरण महतले नेपाली कांग्रेस मध्यावधि निर्वाचनको पक्षमा जान सक्ने आशय व्यक्त गरेका छन् ।
प्रमुख प्रतिपक्षको भूमिका नदेखिएको भन्ने आरोपको खण्डन गर्दै नेता महतले कोरोना संक्रमणको जोखिमले सडकमा आउने अवस्था नरहेको, सदन बन्द गरेर लोकतन्त्रलाई बन्धक बनाएको अवस्था र कांग्रेसलाई सरकारमा जाने जनादेश पनि नरहेको अवस्थामा जनमतबाटै सरकारको विकल्प खोज्नुपर्नेे भन्दै घुमाउरो पारामा वर्तमान ओली सरकारले मध्यावधि निर्वाचनको घोषणा गरोस् भन्ने आशय व्यक्त गरे ।
कम्युनिष्ट र जसपा लगायतका अन्य दलले जस्तो प्रचारवाजीमा कांग्रेस नलाग्ने बताउँदै उनले आवश्यकता अनुसार जनताको साथ लिएर कांग्रेस अगाडि बढ्ने बताए । नेपाली कांग्रेसले मुलुकमा भएका भ्रष्टाचार र वेथितिको विरोध गरिरहँदा हठातमा आएर संसद नै बन्द गरेर लोकतन्त्रलाई बन्धक बनाएको र बाहिर सडकबाट खबरदारी गर्नका लागि कोरोना महामारीको संक्रमणको जोखिम भएको र यो अवस्थामा ओली नेतृत्वको सरकारमा पनि जाने सम्भावना नरहेकोले अब जनताको साथबाट कांग्रेस अगाडि बढ्ने बताए ।
महतले वर्तमान प्रधानमन्त्री केपी ओली नेतृत्वको सरकार निर्वाचित सरकारमध्ये इतिहासकै भ्रष्ट भएको आरोप लगाउदै ट्रान्सपरेन्सी इन्टरनेशनलको तथ्यांकले एशियाका भ्रष्टाचार गर्ने देशहरुमध्ये नेपाल सबैभन्दा पहिलो सूचीमा नै परेकोले पनि ओली नेतृत्वको सरकार भ्रष्ट भएको प्रमाणित गरेको दावी गरे ।
कोरोना महामारीमा पैसा छैन भन्दै जनताको मौलिक अधिकारको रुपमा रहेको स्वास्थ्य सेवा पनि प्रभावकारी नदिएर जनताको आवश्यकताप्रति संवेदनशील नभएको बताउँदै उनले कोरोना उपचारका लागि पैसा छैन भन्ने तर पार्टीको नेताको व्यवस्थापनका लागि सामान खरिदमा करोडौं संस्थागत भ्रष्टाचार गरेको आरोप लगाए ।
पूर्व परराष्ट्रमन्त्री समेत रहेका नेता महतले लोकतन्त्रमा जनता नै मुख्य शक्तिको श्रोत भए पनि वर्तमान सरकारले जनतालाई शक्तिको श्रोत नमान्दा बाह्य शक्तिको चलखेल हुन थालेको र यो शुभसंकेत नभएको पनि बताए । एमाले र माओवादी केन्द्रको अप्राकृतिक एकताबाट बनेको नेकपा पार्टीले राष्ट्रियताको नारामा जनताको मत लिएर सरकारमा गए पनि जनताको आधारभूत आवश्यकता समेत पूरा गर्न नसकेर सत्ता केन्द्रीत मात्रै भएको टिप्पणी गरे ।
राष्ट्रियताको अलाप गर्ने सरकारले उत्तरी सीमा अतिक्रमणमा केही नबोल्ने र कालापानी, लिपुलेक, लिम्पियाधुरा लगायतका स्थानका विवादित विषयलाई कूटनीतिक पहलबाट सामाधान नगरी विदेश नीतिमा निकम्मापन देखाएको बताए । कोरोना रोकथाम र नियन्त्रणको नाममा सीमा नाका बन्द गरेर जनतालाई अप्ठ्यारोमा पारेको बताउदै डाक्टर महतले जनतालाई नै सास्ती हुने गरी सीमामा गरिएको थुनछेकले मात्रै कोरोना संक्रमण नरोकिने बताए ।

प्रतिक्रिया दिनुहोस्