विद्युत् विस्तार नहुँदा स्थानीयबासी परम्परागत प्रविधिमै सीमित «

विद्युत् विस्तार नहुँदा स्थानीयबासी परम्परागत प्रविधिमै सीमित

डडेल्धुराको आलिताल गाउँपालिका–१ वनतालका स्थानीय अझै पनि परम्परागत प्रविधिमा आधारित छन् । अहिले पनि तेलका लागि परम्परागत घरेलु प्रविधि कोलकै प्रयोग गर्न स्थानीय बाध्य छन् । जिल्लामा विद्युतीकरण नहँुदा परम्परागत घरेलु मेसिन कोलको प्रयोग अझै भइरहेको हो ।
डेल्धुरामा विभिन्न किसिमका अमिलो, उखु, तोरी, चिउरी पेल्नका लागि गाउँमा निर्विकल्प घरेलु मेसिनका रूपमा रहेको कोलको प्रयोग भइरहेको छ । विद्युत्लाइन विस्तार नहुँदा त्यहाँका स्थानीयले अझै पनि परम्परागत कोलकै प्रयोग गर्ने गरेका छन ।
जिल्लाको ग्रामीण क्षेत्रमा यातायातको पहुँच बढ्दै जानु तथा विद्युतीय मिलको विकाससँगै परम्परागत कोल लोप हुँदै गएका छन् । तर, गाङ्खेत क्षेत्रका स्थानीय भने अहिले पनि परम्परागत कोलको प्रयोग गर्न बाध्य छन् । कोलमा तेल पेल्नका लागि बढी जनशक्ति र शारीरिक श्रम बढी लाग्ने भएकाले दुःख हुने गरेको स्थानीयको हरिसिंह खड्काको भनाइ छ ।
यो क्षेत्रमा अझैं पनि विद्युत् विस्तार हुन सकेको छैन । जनप्रतिनिधिले पनि विद्युत् सेवा विस्तारका लागि ध्यान नदिएको स्थानीयको गुनासो छ । विद्युत् सेवा नहुँदा एक जनाले गर्न सक्ने काम अहिले घरका सबै परिवार आएर ‘कोल’ को प्रयोग गरी तेल पेल्नुपरेको स्थानीय प्रेम खडकाले दुःखेसो गरे ।

प्रतिक्रिया दिनुहोस्