पहिलो खुलामुखी योजनामा उत्साहजनक सहभागिता देखिएको छ «

पहिलो खुलामुखी योजनामा उत्साहजनक सहभागिता देखिएको छ


एनआईसी एशिया क्यापिटल लिमिटेडले एनआईसी एशिया बैंक म्यूचुअल फण्डअन्तर्गतको नेपालमै पहिलो पटक निश्चित आम्दानीमा लगानी गर्ने उद्देश्यसहित सञ्चालन गर्न लागेको पहिलो खुलामुखी योजना एनआईसी एशिया डाईनामिक डेप्ट फण्डको इकाई निष्काशन तथा बिक्री खुल्ला गरीरहेको छ । प्रति इकाई मूल्य १० को दरले ५० करोड इकाई मध्ये ४ करोड २५ लाख इकाई सर्वसाधारण तथा संघ संस्थाहरुले खरिद गर्न मिल्ने गरी निष्काशन तथा बिक्री खुल्ला गरिरहेको छ । मंसिर १२ गतेदेखि बिक्री खुला भएको यस योजनामा माग अनुसारको आवेदन परेमा मंसिर १६ गते अगावै बिक्री बन्द हुनेछ । प्रस्तुत छ । उक्त खुलामुखी फण्डको विशेषता तथा यसमा लगानी गर्दा हुने फाइदाको विषयमा एनआईसी एशिया क्यापिटल लिमिटेडका प्रमुख कार्यकारी अधिकृत रमेन्द्र रायमाझीसँग कारोबारले गरेको कुराकानीको सार :

गत शुक्रबारदेखि निष्काशन भएको खुलामुखी सामूहिक लगानी कोष एनआईसी एशिया डाईनामिक डेप्ट फण्डमा लगानीर्ताहरुको सहभागीता कस्तो पाउनु भएको छ ?
हामीहरुले निष्काशन गरिरहेको म्युचुअल फण्डमा लगानीकर्ताहरुको राम्रो सहभागिता रहेको छ । हामीले निष्काशन गरेको यस प्रकारको योजना नेपालको हकमा पहिलो सामूहिक लगानी योजना भएकाले सर्वसाधारणहरुको सहभागिता कस्तो हुनेछ भनेर निकै चासोका साथ हेरेका थियौं । तर आजको दिनमा सर्वसाधरणको राम्रो सहभागिता भएकाले यस फण्डको आकर्षण राम्रो रहेको देखियो ।

नेपालमा सञ्चालित अधिकांश म्युचुअल फण्ड योजनाहरु बन्दमुखी रहेका छन् । खुलामुखी योजनाको विशेषता र यो योजनामा लगानी गर्दा लगानीकर्तालाई के फाइदा हुनेछ । नेपालमा यस खालको सामूहिक लगानी योजनाको भविष्य कस्तो छ ?
हाल नेपालमा सञ्चालनमा रहेका अधिकांश योजनाहरु बन्दमुखी योजनाहरु मात्र रहेका छन् । मलाई के लाग्छ भने नेपालमा सामूहिक लगानी कोष योजना सञ्चालनको लामो इतिहास नहुनु, धितोपत्रको बजार विस्तार नहुन, नेप्सेमा सूचिकृत कम्पनीहरुको संख्या कम रहेको तथा लगानी गर्नका लागि धितोपत्र बजार तथा बैंक निक्षेप मात्र रहनु जस्ता कारणहरुले गर्दा सुरुमा बन्दमुखी योजना सञ्चालनमा आएका हुन् । विस्तारै हाम्रो धितोपत्र बजारसँगै मुद्रा बजार पनि विस्तार हुँदै गगएको छ । सूचिकृत कम्पनीहरुको संख्यासँगै बजार पुँजीकरण बढ्दै गइरहेका र विस्तारै अन्य क्षेत्रका कम्पनीहरु पनि सर्वसाधारणमा सेयर जारी गरी दोश्रो बजारमा सूचिकरण हुने क्रम रहेकाले आगामी दिनमा बन्दमुखी योजना भन्दा खुलामुखी योजना सञ्चालमा आउने मेरो विश्वास छ ।
खुलामुखी योजनाको प्रमुख विशेषता भनेको लगानीकर्ताहरुले आफूले चाहेको बेलामा इकाइको खरिद बिक्री सहजै रुपमा कोष व्यवस्थापक तथा कोष व्यवस्थापकले तोकेको वितरकहरुबाट गर्न सकिने हो । नेपालको हकमा हेर्ने हो भने लगानीकर्ताले खरिद गरेको धितोपत्र बिक्री गरी बिक्री बापतको रकम प्राप्त गर्न निकै झनझटिलो रहेको गुनासो बारम्बार सुनिने गरेको छ । तर, खुलामुखी योजनाको इकाइको खरिद बिक्री र बिक्री गरिएको रकम सहजै प्राप्त गर्ने व्यवस्था मिलाइएको हुन्छ । हाम्रो फण्डमा संकलित अधिकांश रकम डेप्ट मार्केटमा लगानी गरिने हुँदा यस फण्डमा लगानी गर्दा लगानीकर्ताले स्थिर र नियमित आय प्राप्त हुने, लगानीमा कम जोखिम, लगानीको विविधीकरण, इकाइको खरिद बिक्री गर्दा कारोवार शुल्क नलाग्ने, नियमित रुपमा निश्चित रकम थप गर्दै जान सकिने व्यवस्था, चाहेको बेलामा आफूसँग रहेको इकाई रियल भ्यालुमा बिक्री गर्न सकिने तथा कारोबारको राफसाफ तुरुन्तै हुने जस्ता धेरै फाइदा छन् । नेपालको सन्दर्भमा अबको भविष्य भनेको खुलामुखी योजनाको नै हो । खुलामुखी योजनामा भएको विशेषता तथा यसको महत्वका सम्बन्धमा सर्वसाधारणलाई जानकारी गराउन सकियो भने खुलामुखी योजनाको भविष्य निकै राम्रो रहेको छ ।

डेप्ट फण्डनै निकाल्नुको कारण केही छ ?
हाल नेपालमा सञ्चालित अधिकांश म्युचुअल फण्ड योजनाहरु इक्विटीमा लगानी गर्ने मुख्य उद्देश्यका साथ सञ्चालनमा आएको पाइन्छ । योजनाको अधिकांश रकम इक्विटीमा मात्र लगानी गर्दा जोखिम पनि बहन गर्नुपर्ने हुँदा कम जोखिम र उच्च प्रतिफल हुने लगानीका उपकरणहरुमा सुरक्षित लगानी गरी नियमित रुपमा इकाइधनीलाई प्रतिफल वितरण गर्ने मुख्य उद्देश्यका साथ यो योजना सञ्चालन गर्न लागिएको हो । नेपाल राष्ट्र बैंकले बैंक तथा वित्तीय संस्थाहरुलाई अनिवार्य रुपमा डिबेन्चर निष्काशन गर्नु पर्ने व्यवस्था गरेको परिपेक्षमा केही बैंक तथा वित्तीय संस्थाले डिबेन्चर जारी गरिसकेका र केही प्रकृयामा रहेका छन् । हाल सर्वसाधारणले खरिद गरेको डिबेन्चर बिक्री गर्न कहाँ जाने कसरी बिक्री गर्ने कसलाई बिक्री गर्ने भन्ने जस्ता अनेक प्रश्नहरु बजारमा सुन्न पाइन्छ । डेप्ट फण्डनै निकाल्नुको अर्को मुख्य उद्देश्य भनेको डेप्ट मार्केटलाई चलायमान गराउनु रहेको हो । जसले गर्दा सेयर मात्र नभई भविष्यमा डिबेन्चरहरु पनि सहजै कारोबार गर्ने अवस्था सिर्जना भइ विस्तारै डेप्ट मार्केटको विकास हुँदै जानेमा मेरो विश्वास छ ।

योजनाको रकमको बाँडफाँड कसरी गर्नुभएको छ ?
योजनाको सम्पत्तिको बाँडफाँड गर्दा निश्चित आम्दानी हुने उपकरणहरु अर्थात योजनाको आकारको आधारमा स्थिर आय हुने क्षेत्रमा १५ प्रतिशत, बण्ड डिबेन्चर तथा मुद्रा बजार उपकरण माग तथा अल्प सूचनामा प्राप्त हुने रकममा ६५ प्रतिशत र बाँकी २० प्रतिशत सार्वजनिक निष्कासनमार्फत जारी गरिने साधारण सेयर तथा सूचिकृत कम्पनीहरुको सेयरमा लगानी गरिने छ । उक्त लगानीको सीमा भविष्यमा फण्डको आकार, लगानीको अवसर तथा नियमन निकाएको निर्देशन अनुसार थप घट गर्न सकिनेछ ।

विगतमा पनि दुई वटा म्युचुअल फण्ड योजनाहरु सञ्चालन गर्दै आउनु भएको छ । उक्त फण्डहरुको अहिलेको अवस्था कस्तो रहेको छ । लगानीकर्तालाई केही भन्नु हुन्छ ?
यस भन्दा अगाडी हाल हामीहरुले सञ्चालन गरिरहेको दुई वटानै फण्डमा लगानी गर्ने इकाईधनीहरुलाई लगानी गरेको पहिलो वर्षमै लाभांश वितरण गर्न सफल भएका थियौं । हाम्रो पहिलो फण्ड एनआईसी एशिया ग्रोथ फण्ड सञ्चालनमा आउँदा नेप्से परिसूचक १४ सयको हारहारीमा थियो र उक्त फण्ड सञ्चालनमा आएको पहिलो वर्षको अन्तमा नेप्से परिसूचक घटेर १२ सय ६० को हारहारीमा आउँदा समेत इकाईधनीहरुलाई १० प्रतिशत लाभांश वितरण गर्न सफल भएको थियौं । उक्त फण्ड सञ्चालनको दोश्रो वर्षमा १२ प्रतिशत लाभांश वितरण गर्न सफल भइसकेका छौं । त्यस्तैगरी हाम्रो दोश्रो योजना एनआईसी एशिया ब्यालेन्सड् फण्ड सञ्चालन गरेको पहिलो ८ महिनामा नै ८ प्रतिशत लाभांश वितरण गर्न सफल भएका छौं । हालसम्म ग्रोथ फण्डबाट २२ प्रतिशत लाभांश वितरण गरिसकेपछि पनि हाल यसको न्याभ १३ भन्दा माथि कायम गर्न सफल भएका छौं भने दोश्रो ब्यालेन्सड् फण्डको ८ प्रतिशत लाभांश वितरण गरेपछि उक्त फण्डको न्याभ १२ भन्दा माथि कायम गर्न सफल भएका छौं ।
अहिले हामीले निष्कासन गरिरहेको योजना खुलामुखी योजना भएकोले यसको छुट्टै विशेषताहरु र यसमा लगानी गर्दा पाइने फाइदाहरु तथा हामीले हाल सञ्चालन गरिरहेका फण्डको विगतको राम्रो पर्फमेन्सको कारण लगानीकर्ताहरुको यो योजनामा पनि राम्रो सहभागिता हुनेमा पूर्ण विश्वास लिएको छु ।

विश्वव्यापी कोरोना महामारीको असर नेपाली सेयर बजारमा कत्तिको परेको छ ? बजारको उतारचढावका कारण मर्चेन्ट बंैकमा पनि यसको असर परेको देख्नुहुन्छ ?
कोरोना महामारीको सुरुवाती चरणमा यसको प्रभाव अन्य क्षेत्रमा जस्तै धितोपत्रको बजारमा समेत परेको थियो । तर सेयर बजारमा धेरै कुराहरुले प्रभाव पर्ने हुँदा विस्तारै कोरोना महामारीको अवस्थालाई विर्सँदै धितोपत्रको दोश्रो बजारमा नयाँ नयाँ रेकर्ड कायम गर्दै आएको छ । विगत लामो समयदेखि नेप्से परिसूचक तल्लो विन्दुमै रहनु बचत तथा मुद्धती निक्षेको ब्याजदमा निरन्तर घट्दै जानु तथा अनलाइन कारोबार वृद्धि हुँदै जाँदा पछिल्लो समयमा सेयर बजारमा कोरोना महामारीको प्रभाव कम भएर गएको छ । मर्चेण्ट बैंकिङ्ग व्यवसायमा बजारमा आउने उतारचढाको प्रत्यक्ष अप्रत्यक्ष असर परेको देखिन्छ । खासगरी बजारमा उतारचढाव आउँदा निक्षेप सदस्य अन्तर्गतको सेवा, लगानी व्यवस्थापन सेवा तथा म्युचुअल फण्डसँग सम्बन्धित व्यवसायमा सकारात्मक असर परेको देखिन्छ ।

मर्चेन्ट बैंकहरू भनेको बैंकभन्दा पनि ठूलो महत्वको संस्था हो, तर नेपालमा मर्चेन्ट बैंकहरूलाई बैंकका सहायक कम्पनीका रूपमा ल्याइयो । धेरैले मर्चेन्ट बैंकहरूको अस्तित्व नै स्वीकार्दैनन् । एड्भाइजरी सेवा दिने, एसेस्ट म्यानेजमेन्ट गरिदिने वा बैंकलाई मनि सप्लाइ गर्ने जस्ता मुख्य काम त धेरैले गरेको देखिन्न । नेपालमा मर्चेन्ट बैंकको भविष्य छ त ?
हो । विदेशमा हेर्ने हो भने यहाँले भने जस्तै मर्चेण्ट बैंकरहरु बैंक भन्दा पनि ठूलो संस्थाको रुपमा परिचित हुन्छन् । नेपालको हकमा मर्चेण्ट बैंकिङ्ग व्यवसायको इतिहास लामो नरहेको तथा नेपालमा मर्चेण्ट बैंकरहरुलाई नेपालमा सेयर रजिष्ट्रार र आईपीयो मात्र निष्काशन गर्ने कम्पनीको रुपमा मात्र सर्वसाधारणमा जानकारी रहेकाले तेस्तो धारना बनेको हुन सक्छ । हाल नियामक निकायले मर्चेण्ट बैंकरहरुको कार्यक्षेत्र विस्तार गरिदिएको तथा गर्ने क्रममा रहेको देखिन्छ । विस्तारै मर्चेण्ट बैंकरहरुले समेत आफूले प्रदान गर्दै आएको व्यवसायलाई मर्चेण्ट बैंकिङ्ग र इन्भेष्टमेण्ट बैंकिङ्ग सेवा भनि छुट्याउन थालेको देखिन्छ । परम्परागत मर्चेण्ट बैंकिङ्ग व्यवसाय भन्दा आधुनिक मर्चेण्ट बैंकिङ्ग व्यवसायतर्फ अर्थात् लगानी व्यवस्थापन सेवा, म्युचुअल फण्ड, संस्थागत परामर्श सेवा, एसआईएफ लगायतका सेवाहरु आगामी दिनमा विस्तार हुँदै जाँदा मर्चेण्ट बैंकिङ्ग व्यवसाय समेत विस्तार भई विदेशमा जस्तै बैंक भन्दा मर्चेण्ट बैंकहरु ठूलो संस्थाको रुपमा देखा पर्नेछन् । त्यसैले मर्चेण्ट बैंकरको भविष्य निकै उज्वल देखिन्छ ।

प्रतिक्रिया दिनुहोस्