विदेशमा दाहसंस्कार गरिएका श्रमिकका आफन्तलाई थप ५० हजार सहयोग «

विदेशमा दाहसंस्कार गरिएका श्रमिकका आफन्तलाई थप ५० हजार सहयोग

  • कोरोनाले श्रम गन्तव्यमै मृत्यु भएकाका आफन्तले थप ५० हजार पाउने
  • यसअघि क्षतिपूर्ति लिएका मृतकका आफन्तले पनि थप रकम पाउने
  • वैदेशिक रोजगार बोर्डबाट मृतकका आफन्तको निवेदन लिन सुरु
  • ७० जना मृतकका आफन्तले ७ लाखसहित ५० हजार रुपैयाँ लिए
  • परिवारको सहमतिमा २३४ जनाको शव सम्बन्धित मुलुकमै अन्त्येष्टि

कोरोना संकटका बेला श्रम गन्तव्यमा शव दाहसंस्कार गर्ने श्रमिकका आफन्तले सरकारबाट थप प्रति श्रमिक ५० हजार रुपैयाँ आर्थिक सहयोग पाउने भएका छन् ।
लकडाउनका कारण अन्तर्राष्ट्रिय उडान बन्द हुँदा विदेशमा मृत्यु भएर शव नेपाल ल्याउन नपाई श्रम गन्तव्यमै दाहसंस्कार गरेका श्रमिकका आफन्तलाई सरकारले सहयोगस्वरुप ५० हजार रुपैयाँ सहयोग दिने निर्णय गरेको हो । यो निर्णयपछि विदेशमा मृत्यु भएका श्रमिकका आफन्तले यसअघि लिँदै आएको ७ लाखसहित थप ५० हजार रुपैयाँ पनि पाउने छन् ।
सरकारले कोरोना अवधिमा विदेशमा मृत्यु भइ श्रम गन्तव्यमै दाहसंस्कार गर्ने श्रमिकलाई थप ५० हजार रुपैयाँ आर्थिक सहयोग दिन निवेदन लिन सुरु गरेको वैदेशिक रोजगार बोर्डले जनाएको छ । यसअघि श्रम स्वीकृतिको अवधीमा मृत्यु भएका श्रमिकका आफन्तलाई बोर्डले ७ लाख रुपैयाँ लिएको भएपनि विदेशमा शव दाहसंस्कार गरेको प्रमाणित भएपनि यो ५० हजार रुपैयाँ समेत पाइने छ । बोर्डका कार्यकारी निर्देशक राजनप्रसाद श्रेष्ठले हालसम्म विदेशमा दाहसंस्कार गरेका १७२ श्रमिककका आफन्तले बोर्डमा सहयोगका लागि निवेदन दिएको बताए ।
“आइतबारसम्म ७० जना मृतकका आफन्तले ७ लाखसहित ५० हजार रुपैयाँ सहयोग लिइसकेका छन् ।” निर्देशक श्रेष्ठले कारोबारसँग भने, “हालसम्म सम्बन्धित परिवारको तर्फबाट सहमति प्राप्त भएका कूल २३४ जनाको शव सम्बन्धित मुलुकमा नै अन्त्येष्टि गरिएको छ ।” यसमध्ये पनि वैदेशिक रोजगार नियमावलीअनुसार आर्थिक सहयोग पाउने मादण्डमा परेकाको संख्या भने हालसम्म १७२ जना मात्र रहेको बोर्डले जनाएको छ ।
यसरी विदेशमा दाहसंस्कारको सहमति प्रदान गर्ने परिवारलाई सान्त्वना राहत स्वरुप बोर्डबाट यो हप्ताबाट मात्र सहयोग प्रदान गर्न सुरु गरिएको बोर्डले जनाएको छ । सम्बन्धित मुलुकमा अन्त्येष्टि गरिएका २३४ जना नेपाली कामदारमध्ये १३१ जनाको कोरोना संक्रमणका कारण मृत्यु भएको थियो । ५० हजार आर्थिक सहयोग भने अन्य कारणले विदेशमा मृत्यु भएर मापदण्डमा परेका सबै श्रमिकका आफन्तले पाउने छन् ।
श्रम गन्तव्यमै मृत्यु भएको तथा कोभिड–१९ ले अन्तर्राष्ट्रिय उडान अवरुद्ध हुँदा शव नेपाल ल्याउन नसक्ने अवस्था भएका मृतक श्रमिकका लागि आर्थिक सहयोग योजना ल्याइएको श्रेष्ठले बताए । हाल भने कोरोना संक्रमणबाहेक अन्य कारणले मृत्यु भएका श्रमिकको शव भने नियमित आइरहेको छ ।
यो सहयोग प्राप्त गर्नका लागि श्रम स्वीकृति गरेर गएको श्रमिकको हकमा मात्र लागु हुने जनाइएको छ । बोर्डले सम्बन्धित गन्तव्यमा रहेको नेपाली दूतावासबाट शवदाह गरेको व्यहोराको पत्र भने आवश्यक पर्ने जनाएको छ । यसका लागि मृतकका आफन्तले शव सम्बन्धित मुलुकमा दाहसंस्कार गर्न सहमति भने दिएको हुनु पर्ने छ । यसअघि ७ लाख रुपैयाँ लिएकाहरुले यो सहयोग कार्यक्रम लागु भएपछि थप ५० हजार पाउने जनाइएकोे छ । निर्देशक श्रेष्ठले अधिकांश श्रमिकका आफन्तलाई नियमित दिँदै आएको ७ लाखसहित हाल थप गरिएको ५० हजार एकै पटक उनीको बैंक खातामा जम्मा गर्न थालिएको बताए ।
चैतयता विदेशमा मृत्यु भएका ४२० भन्दा बढी नेपालीको शव स्वदेश ल्याइएको छ । यो संख्या भने विदेशमा मृत्यु भएका श्रमिक र गैरश्रमिकको संख्या हो । मृत्यु भएकामध्ये ११४ मृतकको शव परिवारले गन्तव्य देशमै अन्त्येष्टिका लागि अनुमति दिएको छन् । यसमध्ये कोरोनाका कारण ६ श्रम गन्तव्यमा ११२ भन्दा बढी नेपालीको मृत्यु भएको थियो । विदेशमा मृत्यु भएका र दाहसंस्कार गरिएका सबै श्रमिकका आफन्त सहयोग भने पाउँदैनन् ।

प्रतिक्रिया दिनुहोस्