स्थानीयको लगानीले जलविद्युत् आयोजनामा सहज «

स्थानीयको लगानीले जलविद्युत् आयोजनामा सहज


कास्कीको माछापुछ्रे र अन्नपूर्ण गाउँपालिकामा निर्माणाधीन धेरै जलविद्युत् आयोजनाहरूले स्थानीयवासीको अवरोध खेपिरहेका छन् । तर, माछापुछ्रे गाउँपालिका–२ सार्दिखोलास्थित भराभरीमा निर्माण भईरहेको २५ मेगावाटको सेतीनदी जलविद्युत् आयोजनामा भने कुनै अवरोध छैन ।
माछापुछ्रे गाउँपालिका–२ का अधिकांश अर्थात ४ सय २७ जना स्थानीयवासीलाई जलविद्युत् आयोजनाहरूले संस्थागत (प्रमोटर) सेयरकर्ताको रूपमा लगानी गर्ने अवसर दिएपछि र आयोजनाहरूबारे विस्तृत रूपमा जानकारी गराएपछि यस्तो अवस्था सिर्जना भएको हो । निर्माण सुरु गर्नुअघि आयोजनाका अधिकारीहरूले आफ्नो जलविद्युत्बारे विस्तृत जानकारी दिँदै सेयरकर्ताको रूपमा लगानी गर्ने अवसर दिएका थिए । आयोजना प्रमुख लेखनाथ पाण्डे आफ्नो टिमले एक वर्षसम्म स्थानीयवासीसँग निरन्तर छलफल र अन्तरक्रिया गराएपछि आयोजना निर्माण सहज रूपमा अघि बढ्न सकेको र कुनै पनि अवरोध नआएको बताउँछन् । “झण्डै एक वर्षसम्म म आफै र आफ्नो टिमले सबै स्थानीयवासीसँग आयोजनाका विविध पक्षबारे छलफल ग-यौं, अन्तरक्रिया ग¥यौं, यसले स्थानीयबासीको अपनत्व मात्र बढेन, उहाँहरू सेयरधनीको रूपमा आउनुभयो,” उनले भने, “केही कुरामा समस्या आयो भने उहाँहरू आफै हाम्रो आयोजना हो, विवाद गर्नु हुँदैन भनेर भन्नुहुन्छ, धेरै सहज भएको छ ।”
भिजन लुम्बिनी ऊर्जा कम्पनी लिमिटेडको प्रवद्र्धनमा निर्माण भइरहेको आयोजनामा यहाँका स्थानीयबासीले एक लाखदेखि डेढ लाखसम्म लगानी गरेका छन् । “४ सय २७ स्थानीयबासीले आयोजनाको प्रमोटरको रूपमा सेयर लगानी गरेका छन्, उहाँहरूले आफ्नै आयोजनाहरूको रूपमा सहयोग र सहजीकरण गरिरहनुभएको छ, कुनै वाधा अवरोध छैन,” कम्पनीका अध्यक्ष जगतबहादुर पोखरेलले भने–“स्थानीयबासीको पूर्ण साथ छ, विद्युत् प्राधिकरणसँग विद्युत् खरिद सम्झौता गरिसकेका छौ, वित्तीय व्यवस्थापन पनि भइसकेको छ, समयमै आयोजना सम्पन्न हुन्छ ।” माछापुछ्रे गाउँपालिका– २ वडा अध्यक्ष बिक्रम गुरुङले वडाबाट एक परियोजनालाई सफल पार्न आवश्यक सहयोग गरीर्दै आएको र भोलिका दिनमा पनि सहयोग गर्ने बताए । आयोजनाको अवलोकनका लागि पुगेका गण्डकी प्रदेशका मुख्यमन्त्री पृथ्वीसुब्बा गुरुङले प्रदेश सरकारले आफ्नो क्षेत्रमा निर्माण हुन लागेका आयोजनाहरूको लागि पहुँच मार्ग निर्माणका लागि कार्य गरिदिने गरी अघि बढ्न लागेको बताउँदै आयोजना निर्माणमा सहजीकरण गर्ने बताए ।
वित्तीय व्यवस्थापन हुनु अघिदेखिनै प्रवद्र्धकहरूको लगानीमार्फत निर्माण सुरु गरिएको आयोजनाको ११ प्रतिशत काम सकिएको छ । भराभरीमा आयोजनाको बाँध निर्माण गरी ६ हजार ४ सय मिटर लामो भूमिगत पाइप बिछ्याएर पोखरा महानगरपालिका–१९ सँग सीमा जोडिएको चिन्ते बगरमा निर्माण गरिने विद्युत् गृहमा १ सय ८७ मिटर उचाइबाट खसालिने भएको छ । आयोजनाबाट उत्पादित विद्युत् साँढे चार किमी दूरीमा रहेको माछापुछ्रे गाउँपालिकाको वडा नं ४ लाहाचोकमा निर्माणाधीन सवस्टेशनमा जडान गरी राष्ट्रिय प्रसारण लाइनमा जोड्ने योजना रहेको कम्पनीले जनाएको छ ।
आयोजना प्रमुख पाण्डेका अनुसार, पाँच महिना अघिदेखि निर्माण सुरु भएर २२ महिनाभित्र सम्पन्न गर्ने लक्ष्य राखिएको आयोजनाबाट १४८ गिगावाट आवर विद्युत् उत्पादन हुनेछ । गत असोज अन्तिम साता एनएमबी बैकको नेतृत्वमा कर्मचारी संचय कोष र कृषि बैकले ३ अर्ब ५० करोड लगानी गरेका छन् । आयोजनामा ३० प्रतिशत इक्वेटी (स्वपुँजी) मध्ये १० प्रतिशत स्थानीयबासीसहित सर्वसाधारणका लागि ३० प्रतिशत सेयर दिने लक्ष्य राखिएको छ ।
हाल सिभिल निर्माणतर्फको सेटलिङ बेसिन (पानी थिग्राउने पोखरी) काम भइरहेको छ । हाइड्रो, इलेक्ट्रिक मेकानिकलका साथै प्रसारणसहितको क्रमशः सुरु गर्दै जाने लक्ष्य आयोजनाले लिएको प्रमुख पाण्डेले बताए । उनका अनुसार, ७ बर्षभित्र प्रतिफल आईसक्ने आयोजना पहुँचमार्ग निर्माण भइसकेको, अन्नपूर्ण र माछापुछ्रे हिमालको कारण हाइड्रोलोजी राम्रो रहेको, छाटो प्रसारण लाइन निर्माण मात्र गर्नुपर्ने लगायतको कारण आकर्षक देखिएको छ ।

प्रतिक्रिया दिनुहोस्