खाद्य कम्पनीले आइतबारदेखि खसीबोका ल्याउने «

खाद्य कम्पनीले आइतबारदेखि खसीबोका ल्याउने


खाद्य व्यवस्था तथा व्यापार कम्पनी लिमिटेडले आगामी आइतबारदेखि उपत्यकामा खसीबोका भित्र्याउने भएको छ । बजार मूल्य हस्तक्षेप गरी उपभोक्तालाई सहुलियत दिनका लागि कम्पनीले विभिन्न जिल्लाबाट खरिद गरेर ल्याउन लागेको हो । प्रत्येक वर्ष घटस्थापनाको दिन भित्र्याएर भोलिपल्टदेखि बिक्री गर्दै आएकोमा यो वर्ष खरिद गर्न ढिलाई भएकाले ३ कात्तिकबाट मात्र बिक्री खुला गरिने कम्पनीले जानकारी दिएको छ । दसैंमा बजारमा खसीबोकाको खपत धेरै हुने हुँदा बजार मूल्य नियन्त्रण गर्नका लागि ल्याउन लागिएको कम्पनीका नायव महाप्रवन्धक श्रीमणिराज खनालले जानकारी दिए ।
यो वर्ष च्याङ्ग्रा खरिद गर्न नपाइएकाले खसीबोका मात्र ल्याउन लागिएको उनले जानकारी दिए । च्याङ्ग्रा खरिद गर्न नपाएकाले यो वर्ष बिक्री नगर्ने उनको भनाइ छ । यो वर्ष पहिलो चरणमा एक हजार संख्यामा खसीबोका ल्याइने र माग बढ्दै गयो भने थप गर्न सकिने कम्पनीले जानकारी दिएको छ । कोराना भाइरसको कारणले गर्दा यो वर्ष अघिल्ला वर्षको तुलनामा खसीबोकाको खपत कम हुने अनुमान गरिएको छ ।
दसैंमा उपत्यकामा खसीबोकाको खपत धेरैे हुँदा व्यवसायीले बढी मूल्य निर्धारण गरि उपभोक्ता ठगिने सक्ने भन्दै कम्पनीले बजार मूल्य हस्तक्षेप गर्नका लागि खसीबोका बिक्री गर्न लागेको जनाएको छ । कम्पनीले प्रतिकेजी १० रुपैयाँ छुट दिने भएको छ । कम्पनीले गत वर्ष १८ करोड ७८ लाख ५ हजार रुपैयाँ लागतमा एक हजार संख्यामा खसीबोका र ३८ करोड ३२ लाख २१ हजार लागतमा २ हजार संख्यामा च्याङ्ग्रा ल्याएर बिक्री गरेको थियो ।
यसैबीच, व्यवसायीले पनि दसैंलाई लक्षित गरेर उपत्यकामा खसीबोका भित्राउन सुरु गरेका छन । दसैंमा खसीबोकाको खपत धेरै हुने भएकाले व्यवसायीले विभिन्न जिल्लाबाट खसीबोका ल्याउन थालेका हुन् । यो सातादेखि दैनिक ठूलो संख्यामा उपत्यकामा खसीबोका भित्रिरहेको व्यवसायी दिपक थापाले जानकारी दिए । घटस्थापनाको दिनदेखि सप्तमीका दिनसम्म उपत्यकामा धेरै खसीबोका भित्रिने उनको भनाइ छ ।
दसैंमा सर्वसाधारणले बढी मासु उपभोग गर्ने भएकाले पनि खसीबोकाको खपत धेरै हुने गर्छ । यो वर्ष उपत्यकामा ४० देखि ५० हजार सख्यामा खसीबोका खपत हुने व्यवसायीले अनुमान गरेका छन् । दसैंलाई लक्षित गरेर निजी व्यवसायीले गाउँ गाउँमा गएर खसीबोका खरिद गरेर बजारमा ल्याउन सुरु गरिसकेका छन् । स्थानीय उत्पादनले माग धान्न नसकेपछि छिमेकी मुलुक भारत र चीनबाट समेत खसीबोका र च्याङ्ग्रा आयात हुने गर्छ ।

प्रतिक्रिया दिनुहोस्