असोज २२ गतेसम्म महसुल तिरे जरीवाना नलाग्ने «

असोज २२ गतेसम्म महसुल तिरे जरीवाना नलाग्ने

नेपाल विद्युत् प्राधिकरणले आगामी असोज २२ गतेसम्म बिजुली बिल तिरे थप दस्तुर तथा जरीवाना नलगाउने भएको छ ।
मंगलबार ऊर्जा, जलश्रोत ताथ सिँचाइमन्त्री वर्षमान पुनले प्राधिकरणका निमित्त कार्यकारी निर्देशकसहितको टोलीलाई बोलाएर जरीवाना नलाग्ने व्यवस्था गरेपछि प्राधिकरण व्यवस्थापनले २२ असोजसम्म महशुल नतिरेमा थप दस्तुर नलाग्ने व्यवस्था गरेको हो । विद्युत् प्राधिकरणका सूचना अधिकारी लीला अर्यालका अनुसार, २२ असोजसम्म तिरेमा कुनै जरीवाना लाग्ने छैन भने असोज २३ गतेदेखि ३० गतेसम्म तिरेमा थप ५ प्रतिशत दस्तुर लाग्नेछ । भदौ महिनासम्मको महशुल भुक्तानी गर्दा थप दस्तुर तिरेमा आगामी बिलमा समायोजन गर्ने पनि प्राधिकरणले जनाएको छ ।
मन्त्री पुनले निमित्त कार्यकारी निर्देशक लेखनाथ कोइराला र ग्राहक तथा वितरण निर्देशनालयका उपकार्यकारी निर्देशक हरराज न्यौपानेलाई मन्त्रालयमा बोलाएर जरीवाना लिएको भए आगामी महिना बुझाउने महशुलमा समायोजन गर्न निर्देशन दिएका थिए ।
पछिल्लो समयमा महशुल तिर्न पुगेका कतिपय ग्राहकले सो अवधिमा मिटर रिडिङ नगरी बिलिङ गरेको र जरीवाना लगाएको गुनासो उपभोक्ताहरुबाट आएको थियो । प्राधिकरणका निमित्त उपकार्यकारी निर्देशक कोइरालाले असोज २२ गतेसम्म तिर्नेलाई थप जरीवाना नगर्न देशभरका वितरण केन्द्रलाई एकैसाथ निर्देशन दिइसकेको र सार्वजनिक सूचना समेत जारी गरिएको बताए । प्राधिकरणले ग्राहक स्वयंले मिटर रिडिङ गरेर इन्टरनेट वाइजरमा कन्जुमर डटएनइएडटओआरजीडटएन मा गई विवरण अध्यावधिक गर्न तथा प्राधिकरणको हटलाइन ११५० मा फोन गरी रिडिङ अंक टिपाएर पनि विद्युत् महशुल तिर्न सक्ने व्यवस्था गरेको छ ।
प्राधिकरणले ग्राहकले अनलाइन पेमेण्टको माध्यमबाट समेत आफ्नो खपत विवरण जानकारी लिई भुक्तानी गर्न सक्ने, कुनै कारणवेश बिल प्राप्त नभएमा मिटर रिडिङ अंक टिपाएर प्रतिलिपी बिल लिई समयमा महशुल गर्न सक्ने तथा खपतको आधारमा अग्रिम भुक्तानी गरेमा छुट सुविधा उपलब्ध गराइने पनि जनाएको छ ।

तत्काल उद्दार टोली बनाउन निर्देशन
मन्त्री पुनले खराब मौसम, प्रणालीको खराबी वा अरु प्राविधिक कारणले विद्युत् अनियमित भए तत्काल समस्या समाधान गर्ने गरी तत्काल उद्दार टोली बनाउन प्राधिकरणलाई निर्देशन दिएका छन् ।
लकडाउनयता ९० लाख विद्यार्थी घरमै बसेर अनलाइन कक्षा लिइरहेको भन्दै मन्त्री पुनले विद्युत् नियमित नभए उनीहरुको पढाइ प्रभावित हुने भएकाले प्राधिकरणको मुल नेतृत्व नभएको समयमा वितरण प्रणालीमा कुनै कमजोरी आउन नदिन निर्देशन दिएका हुन् । यस्तै मन्त्री पुनले लकडाउन अवधिमा सरकारले ग्राहस्थ र औद्योगिक ग्राहकलाई दिने भनेको छुट तत्काल कार्यान्वयन गर्न पनि निर्देशन दिएका छन् ।

प्रतिक्रिया दिनुहोस्