सिन्डिकेटलाई तोड्नका लागि म मैदानमा आएको हुँ : सिंह «

सिन्डिकेटलाई तोड्नका लागि म मैदानमा आएको हुँ : सिंह

नेपाल निर्माण व्यवसायी महासंघको आशन्न ११ औं अधिवेशनमा अध्यक्षका उम्मेदवार रवि सिंहले निर्माण व्यवसायी क्षेत्रमा रहेको सिन्डिकेटलाई तोड्नका लागि आफू मैदानमा आएको बताएका छन् ।
रिपोर्टर्स क्लब नेपालको साक्षात्कारमा बोल्दै अध्यक्षका उम्मेदार सिंहले निर्माण व्यवसायीहरूमा समानता र क्षमताका आधामा काम लिने रीत बसाल्नुपर्ने भन्दै आफ्नो नीति लागू गर्न अध्यक्ष पदको लागि पुनः चुनावी मैदानमा होमिएको स्पष्ट पारे ।
उनले भने, “१५ हजार साना निर्माण व्यवसायीहरूको हकहितमा र सरकारलाई निर्माण खरिद ऐनलाई परिमार्जन गर्न आवश्यक छ, हिजोका दिनहरूमा नेतृत्वले गल्ती गर्यो, स्व. शरद गौचनले निश्चित व्यक्तिको झुण्डमा बसेर काम गर्नुभयो, सम्पूर्ण बजेटको ६० प्रतिशत निर्माण व्यबसायीको हातमा जाने हुनाले हामीलाई हेर्ने दृष्टिकोण पनि फरक हुन्छ, त्यसैमा १५ जनादेखि २० जनासम्मले काम पाउने र अरू १५ हजार निर्माण व्यवसायीहरूले काम नपाउने असमान काम वितरण हुन्छ, सरकारले यसमा ऐन बद्लेर समृद्धिको योजना अघि सार्नुपर्छ ।’
समृद्धिको अभियानलाई सफल पार्ने आफूहरूको महत्वपूर्ण भूमिका हुने बताउँदै उनले भने, “काम लिने तर समयमा काम नगर्ने, काम होल्ड राख्नेहरूलाई प्रभावित पार्नेगरि खरिद ऐन ल्याउन आवश्यक छ, म त्यो पक्षमा छु, साना निर्माण व्यवसायीहरूको हितमा काम गर्ने मेरो उद्देश्य हो ।”
उनले समयमै र गुणस्तर काम, जसको नीति उसकै नेतृत्वको आधारमा आफू चुनावी मैदानमा आएको जिकिर गरे । उनले थपे, “म यस संस्थाको केन्द्रीय सदस्य, कोषाध्यक्ष, द्वितीय उपाध्यक्ष, वरिष्ठ उपाध्यक्ष हुँदै आजको दिनसम्म यहाँ आएको छु, मेरा केही प्रतिस्पर्धी साथीहरू हुनुहुन्छ, नेकपा र लोकतान्त्रिक पक्षका तर म कुनै पक्षको नभएर निर्माण व्यवसायीको पक्षधर हुँ, यसपाली साथीहरूले मलाई विजयी गराउनुहुन्छ ।”
सिंहले स्थिर सरकार भएको र सरकारले आफ्नो दायित्व पूरा गर्ने हो भने आगामी दिनमा निर्माण व्यवसायीहरूले जनताले चाहेअनुसारको काम गर्ने दाबी गरेका छन् ।

प्रतिक्रिया दिनुहोस्