कारोबार संवाददाता
मंगलबार, मंसिर ५, २०७४
1100

कोकाकोला नेपाल, अखिल नेपाल फुटबल संघ (एन्फा) तथा युवा तथा खेलकुद मन्त्रालयले संयुक्त रूपमा आयोजना गर्ने गरेको ‘कोकाकोला कप २०७४’ को राष्ट्रिय तह सुरु भएको छ । विद्यालय स्तरीय आधारभूत तहको देशकै सबैभन्दा ठूलो प्रतियोगिता हो ।
यसका अतिरिक्त, एन्फासँग आबद्ध ४३ जिल्लाहरूमा प्रतियोगिता खेलिएको थियो, जसमा हरेक जिल्लाबाट ३५ भन्दा बढी विद्यालयहरू सहभागी भएका थिए । यति धेरै संख्यामा छात्र र छात्रा खेलाडीको सहभागिता रहने यो नेपालकै सबैभन्दा बृहत् प्रतियोगिता हो ।

कोकाकोला कप नेपाली युवाहरूलाई फुटबलमा आफ्नो प्रतिभा प्रस्तुत गर्ने तथा आफ्नो क्षमतालाई विकास गर्ने अवसर प्रदान गर्ने संरचना हो । यो वर्षको प्रतियोगिता जिल्ला तह, क्षेत्रीय तह र केन्द्रीय तह गरी तीन तहमा वर्गीकरण गरिको थियो । जिल्ला तहका खेलहरू क्रमशः ४३ जिल्लाहरूमा ०७४ असार २३ गतेदेखि साउन १३ गतेसम्म आयोजना भएको थियो, क्षेत्रीय तहको प्रतियोगिताहरू ५ क्षेत्रहरूमा ६ वटा स्थानमा क्रमशः ०७४ साउन २९ गतेदेखि भदौ ९ गतेसम्म सञ्चालन भएको थियो, त्यसैगरी राष्ट्रिय तहका खेलहरू काठमाडौंमा सोमबारबाट सुरु भएको छ ।
एन्फा कम्प्लेक्स खेल मैदानमा जारी कोकाकोला कप अन्तर विद्यालय फुटबल प्रतियोगिता छात्रतर्फ अन्तर्गत एभरेस्ट सेकेन्डरी एकेडेमी (सलार्ही) र बाल सिर्जनालाय स्कुल (काठमाडौं) प्रतियोगिताको फाइनलमा प्रवेश गरेको छन्। यी दुई टिम मंसिर ८ गते शुक्रबार फाइनल उपाधिका लागि भिड्ने छन् । सोमबार सम्पन्न भएको प्रतिस्पर्धामा एभरेस्ट सेकेन्डरी एकेडेमी (सलार्ही)ले महेन्द्र मेमोरियल इंग्लिस बोर्डिङ स्कुल (सुनसरी)लाई ४–२ ले पराजित गरेर फाइनलमा प्रवेश गर्न सफल भएको छ । जसमा एभरेस्ट सेकेन्डरी एकेडेमी (सलार्ही)का ऋतिक खड्काले (१) र मदन श्यांग्तनले (३) गोल गर्न सफल भए भने महेन्द्र मेमोरियल इंग्लिस बोर्डिङ स्कुल (सुनसरी)का निकेश तामाङले (१) भरत चौधरीले (१) गोल गरे । त्यसैगरी दोस्रो प्रतिस्पर्धामा बाल सिर्जनालाय स्कुल (काठमाडौं)ले गजुरमुखी स्कुल (काठमाडौं)लाई १–० ले पराजित गरी फाइनलमा प्रवेश गर्न सफल भएको छ । जसमा निमल मोक्तानले एकल गोल गरि आफ्नो टिम लाई फाइनलमा प्रवेश गराउन सफल भए ।

सोमबार सम्पन्न भएको एन्फा कम्प्लेक्स खेल मैदानको प्रतियोगितामा छात्रा तर्फबाट नेपालय इंग्लिस माध्यमिक बिद्यालय (काठमाडौँ) र सेती शारदा माध्यमिक विद्यालय (सिधुपल्चोक ) को खेल १–१ बराबरीमा टुंगियो । त्यसैगरी, दोस्रो प्रतिस्पर्धा शंकर सरस्वति अन्नपूर्ण आधारभूत विद्यालय (कैलाली ) ले ब्राइट माध्यमिक विद्यालय (काठमाडौँ) लाई ७–० ले हरायो । आजको अन्तिम प्रतिस्पर्धामा भुम्रे माध्यमिक विद्यालय (स्याङ्जा) ले आदर्श उच्च माध्यमिक विद्यालय (सुनसरी) लाई ४–१ ले हरायो ।