कारोबार संवाददाता
मंगलबार, बैशाख ३१, २०७६
1059

आर्यतार इन्भेस्टमेन्ट एन्ड सेक्युरिटिजले दाङको घोराहीस्थित न्युरोडमा दोस्रो शाखा सञ्चालनमा ल्याएको छ । स्टक ब्रोकर ५७ ले दाङका सर्वसाधारणलाई दोस्रो बजारमा सहभागी गराउने लक्ष्यसहित शाखा विस्तार गरिएको जनाएको छ । शाखा विस्तार भएसँगै बजारमा लगानीकर्ताको संख्यासमेत बढ्ने विश्वास आर्यताराले लिएको छ । एक कार्यक्रमकाबीच घोराही उद्योग वाणिज्य संघका अध्यक्ष नारायण भुसाल र आर्यतारा इन्भेस्टमेन्ट एन्ड सेक्युरिटिजका अध्यक्ष भरतप्रसाद नेपालले नयाँ शाखाको संयुक्त रूपमा उद्घाटन गरेका हुन् ।
शाखाको उद्घाटन गर्दै उद्योग वाणिज्य संघका अध्यक्ष भुसालले मुलुकभरका सर्वसाधारणले दोस्रो बजारबाट सेयर कारोबार गर्न नसकिरहेको अवस्थामा दाङमा सेवा सुरु गरेको भन्दै आर्यतारा सेक्युरिटिजलाई बधाई तथा धन्यवाद दिएका थिए । उनले सहज रुपमा आम लगानीकर्ताले सेयर कारोबार गर्न सक्ने व्यवस्था मिलाउन आर्यतारालाई सुझाव पनि दिए ।

शाखा विस्तार गर्दै आर्यतारा इन्भेस्टमेन्ट एन्ड सेक्युरिटिजका प्रबन्ध निर्देशक गुणनिधि भुसालले राजधानी केन्द्रित लगानीकर्ताले सरह घोराहीका लगानीकर्ताले पनि उत्कृष्ट सेवा पाउने गरी व्यवस्था मिलाइएको बताए ।
कार्यक्रममा सहभागी ठूलो संख्यामा रहेका सर्वसाधारणलाई भुसालले भने, “आज सानो सानो रकमको सेयर किनेर पनि भोलि ठूलो पुँजी निर्माण गर्न सकिन्छ । कसरी सेयर किन्ने अनि बेच्ने भन्ने विषय सानो सानो कारोबार गरेर जानिन्छ । त्यसैले आजैबाट सानो रकमको भए पनि सेयर कारोबार गर्न थाल्नुहोस् । हामी सहज रूपमा उत्कृष्ट सेवा दिनेछौं ।”
बजार विस्तारमा जोड दिएका भुसालले लगानीकर्ता सचेतनाका लागि दाङमा आर्यताराले सहयोगी भूमिका निर्वाह गर्ने प्रतिबद्धतासमेत जनाए । घोराही नगरपालिका–१४ का वडाअध्यक्ष शक्तिबहादुर डाँगी तथा सक्रिय लगानीकर्ता रमेश केसीले उत्कृष्ट सेवा पाउनेमा आफुहरू विस्वस्त रहेको बताएका थिए ।
देशव्यापी रूपमा स्टक ब्रोकरको सेवा बिस्तार हुन नसकिरहेको अवस्थामा ग्रामिण भेगका सर्वसाधारणलाई समेत दोस्रो बजारमा सहभागि गराउँदै बजार विस्तार गर्ने लक्ष्य आर्यताराले लिएको छ । यसअघि नै आर्यताराले बुटवलमा पहिलो शाखा सञ्चालनमा ल्याइसकेको छ ।