नेपाल टेलिकम
कारोबार संवाददाता
सोमवार, कार्तिक २७, २०७४

नेपाल टेलिकमले दार्चुला, जुम्ला, कालिकोट र हुम्ला जिल्लाका अति दुर्गम  १० स्थानमा एनटीस्याटमार्फत दूरसञ्चार सेवा सञ्चालनमा ल्याएको छ । आगामी प्रदेश सभा र प्रतिनिधिसभाको निर्वाचनको सन्दर्भमा कुनै पनि दूरसञ्चार सेवा नपुगेका ती स्थानहरूमा अविलम्ब सेवा सञ्चालन गर्न नेपाल सरकारबाट समेत निर्देशन भएकाले कम्पनीले ती स्थानहरूमा केही साताअघिदेखि सेवा सञ्चालनमा ल्याउन सुरु गरेको थियो । 
तीमध्ये हुम्ला जिल्लाको चङखेली गाउँपालिकामा कात्तिक २६ गतेदेखि सेवा सञ्चालनमा ल्याएपश्चात्  १० वटै स्थानमा सेवा उपलब्ध भएको छ ।  यसरी हालै सेवा सञ्चालनमा ल्याइएका स्थानहरूमा दार्चुला जिल्लाको व्यास गाउँपालिका, नौगढ गाउँपालिका र अपि हिमाल गाउँपालिका, जुम्ला जिल्लाको कङ्कासुन्दरी गाउँपालिका, कालिकोट जिल्लाको महावै गाउँपालिका र हुम्ला जिल्लाको कडाकोट, चङखेली र खार्पुनाथ गाउँपालिका रहेका छन् । यी गाउँपालिका न्तर्गत दार्चुलाको हुति, धुलिगढा र खण्डेश्वरी, जुम्लाको बुम्रमादीचौर, कालिकोटको पातामघाट र ओदङखु तथा हुम्लाको मैला, मेघ्पा, खार्पुनाथ र श्रीमस्तामा उपकरण जडान गरिएको कम्पनीले जनाएको छ । अति दुर्गम भएकाले छिटो सेवा सञ्चालनका लागि कम्पनीले हेलिकोप्टरको समेत प्रयोग गरी उपकरणहरू ढुवानी गरेको थियो ।