नेपाल विद्युत् प्राधिकरणका कार्यकारी निर्देशक कुलमान घिसिङले अघोषित रूपमा लोडसेडिङ नगरेको बताएका छन् ।
बिहीबार प्रेस विज्ञप्ति जारी गरेर उनले अहिले औद्योगिक ग्राहकलाई दैनिक तीन घण्टाबाहेक अन्य ग्राहकलाई घोषित-अघोषितरूपमा कुनै प्रकारको लोडसेडिङ नगरिएको बताएका हुन् । “प्राविधिक समस्याका कारण कहीं कतै केही बेरसम्म विद्युत् आपूर्तिमा अवरोध आएको अवस्थामा समेत यस्ता समस्या देखिनासाथ प्राधिकरणले तत्काल प्राविधिक टोली खटाएर समस्या समाधान गरी विद्युत् आपूर्ति सुचारु गरिरहेको छ ।” उनले विज्ञप्तिमा भनेका छन्, “आपूर्तिमा गुणात्मक सुधार ल्याउन ग्राहकहरूको मागलाई समेत मध्यनजर गरी फिडर तथा ट्रान्सफर्मरको क्षमता बढाई समग्र विद्युत् वितरण प्रणालीलाई सदृढीकरण गर्ने कार्यलाई उच्च प्राथमिकतामा राखी सोहीअनुसार देशैभरि काम भइरहेको छ ।”
हिउँदको विद्युत् मागको व्यवस्थापनका लागि प्राधिकरणले आफ्नो स्वामित्वमा रहेका विद्युत्गृहको कुशलतापूर्वक उच्चतम् सञ्चालन, निजी क्षेत्रको उत्पादन र अपुग विद्युत् विगतमा झैं भारतबाट आयात गर्ने योजना बनाएको र हिउँदयामको विद्युत् आपूर्तिका लागि नेपाल आत्मनिर्भर भई नसकेको अहिलेको अवस्थामा विगतमा झैं विद्यमान नेपाल–भारत प्रसारणलाइन संरचनाहरूबाट सहजरूपमा विद्युत् आपूर्ति भई नै रहेको र यसको निरन्तरताका लागि भारत सरकार र सम्बन्धित नियकायहरूबाट प्राधिकरणले सहयोग पाइरहेको विज्ञप्तिमा उल्लेख छ ।
विद्युत् चोरीलाई निरुत्साहित गर्दै माग बढी हुने साँझ र बिहान विद्युत् खपत बढी गर्ने हिटर, वासिङ मेसिन, आइरन, पानी तान्ने पम्पलगायतका विद्युतीय उपकरण प्रयोगमा नल्याएर ‘उज्यालो नेपाल’ बनाउने अभियानमा गत वर्षझैं यस वर्ष पनि आ–आफ्नोतर्फबाट सहयोग गरी दिनुहुन प्राधिकरणले विज्ञप्तिमार्फत आग्रह गरेको छ ।
