कारोबार संवाददाता
बुधवार, श्रावण २, २०७५
2303

बजेटमा पश्चिम सेती जलाशययुक्त आयोजना स्वदेशी लगानीमा निर्माण गर्ने घोषणा गरिए पनि प्रधानमन्त्री नेतृत्वको लगानी बोर्ड चिनियाँ कम्पनीलाई नै दिन लचिलो देखिएको छ । मंगलबार बसेको बैठकले चिनियाँ कम्पनीले उठाएका केही सर्तबारे ऊर्जा र अर्थ मन्त्रालयको समन्वयमा दुई महिनाभित्र टुंग्याउने निर्णय गरेको छ । सरकारले बजेटमा स्वदेशी लगानीमा नै बनाउने निर्णय गरेपछि चिनियाँ विदेश मन्त्रालयले आयोजनाको अनुमतिपत्र कम्पनीसँगै रहेको जिकिर गरेको थियो ।
आयोजना अघि बढाउन विद्युत् प्राधिकरणका केही प्रावधान सुधार हुनुपर्ने शर्त राखेपछि लगानी बोर्डले प्रधानमन्त्री तथा मन्त्रिपरिषद् कार्यालयका सचिवको संयोजकत्वमा समिति गठन गरी एउटा प्रतिवेदन दिएको थियो । तर, यसबारे लगानी बोर्डले कुनै निर्णय नगरी बजेटमा स्वदेशी लगानीमा बनाउने उल्लेख थियो । वैठकले खुला प्रतिस्पर्धामार्फत काठमाडौंको फोहोर व्यवस्थापनका लागि छनोट भएको कम्पनीसँग परियोजना विकास सम्झौता (पीडीए) गर्ने निर्णय पनि गरेको छ ।
यसका लागि लगानी बोर्डलाई अख्तियारी दिएको छ । काठमाडौं महानगरपालिकासहित १० नगरपालिकाको फोहोर व्यवस्थापनका लागि अन्तर्राष्ट्रिय खुला प्रतिस्पर्धामार्फत छनोट भएको नेपवेष्ट र लगानी बोर्डबीच गत फागुनमा प्रारम्भिक पीडीए भएको थियो । बैठकले नेपालको सौर्य ऊर्जा उत्पादन तथा व्यवस्थापन परियोजनाका लागि २० करोड अमेरिकी डलर वैदेशिक लगानी स्वीकृत गर्ने निर्णय गरेको छ ।


सातामा धेरै पढिएको