भीम गौतम
मंगलबार, फाल्गुन ६, २०७६
422

 

जनतालाई सहज र सुरक्षित बिजुलीः प्रधानमन्त्री

नेपाल विद्युत् प्राधिकरणले काठमाडौँ उपत्यकाको विद्युत् वितरण प्रणालीलाई भूमिगत बनाउन सुरु गरेको छ । जताततै बिजुली तार अव्यवस्थित र अस्तव्यस्त भन्दै आलोचना भइरहेका बेला विद्युत् प्राधिकरणले विकसित राष्ट्रहरुले उपयोगमा ल्याइसकेको आधुनिक र भरपर्दो रुपमा वितरण प्रणालीलाई भूमिगत बनाउन सुरु गरेको हो ।
पहिलो चरणमा रत्नपार्क र महाराजगञ्ज वितरण केन्द्र अन्तर्गतका क्षेत्रहरुमा साढे चार सय किलोमिटर विद्युत् वितरण प्रणाली भूमिगत बनाउने गरी सोमबारदेखि आयोजना सुरु भएको हो । प्रधानमन्त्री केपी शर्मा ओलीले काठमाडौँको वितरण प्रणाली भूमिगत तथा सुदृढीकरण कार्यको शुभारम्भ गर्दै जताततै छरिएका तारहरुको गुजुल्टोहरुको अन्त्य भएर सहरको शोभा बढाउने बताए । “भूमिगत वितरण प्रणाली निर्माणले सहरको सौन्दर्य पनि बढाउँछ,” उनले भने, “जनताले सहज र सुरक्षित रुपमा विद्युत् पाउँछन् ।” उनले विकास आयोजनाहरुमा नयाँ प्रविधिहरुको उपयोग बढाउँदै लगेको बताउँदै सरकारले विद्युत् उत्पादन र खपत बढाउनुका साथै निर्यातमार्फत् मुलुकको अर्थतन्त्रलाई बलियो बनाउँदै लगेको बताए । ऊर्जा, जलस्रोत तथा सिँचाइ मन्त्री वर्षमान पुनले दुई वर्षभित्र सबैलाई विद्युत् पहुँच पु-याइसक्ने लक्ष्य सफल पार्न तथा विद्युत्को गुणस्तरमा अभिवृद्धिका लागि स्तरोन्नतिको काममा मन्त्रालय केन्द्रित भएको बताए । उनका अनुसार, भूमिगत वितरण प्रणाली सफल बनाउनका लागि सबै सरोकारवालाहरुको समन्वय र सहकार्य महत्वपूर्ण छ ।

विद्युत् प्राधिकरणका अनुसार, महाराजगञ्ज वितरण केन्द्रअन्तर्गतका बालुवाटार, बूढानीलकण्ठ, टोखा, गोंगबु लगायतका क्षेत्रमा २५० किलोमिटर अप्टिकल फाइबरसहित ११ हजार भोल्टेज र ४ सय भोल्टेजको भूमिगत लाइन निर्माण गरिने छ । त्यसैगरी रत्नपार्क वितरण केन्द्र अन्तर्गत बागबजार, पुतलीसडक, न्यूरोड, अनामनगर, जमल, लैनचौर, ठमेल, नक्साल, सोह्रखुट्टे, त्रिपुरेश्वर, टेकु, थापाथली, माइतीघर, सिंहदरबार, लाजिम्पाट, गौशाला, एयरपोर्ट, बानेश्वर लगायतका क्षेत्रहरुमा दुई सय किलोमिटर अप्टिकल फाइबरसहित जडान गर्ने योजना प्राधिकरणको छ । दुई वितरण केन्द्रपछि काठमाडौँका बाँकी क्षेत्रका साथै भक्तपुर, ललितपुरका साथै अन्य वितरण केन्द्रहमा समेत भूमिगत वितरण प्रणालीलाई अघि बढाउने योजना प्राधिकरणको छ ।
एशियाली विकास बंैक (एडीबी) को ऋण सहायताका साथै सरकार र विद्युत् प्राधिकरणले अघि बढाउन लागेको आयोजना सन् २०२१ को अक्टोबरभित्रमा सक्ने गरी भारतीय कम्पनी केईआई इन्ड्रष्ट्रिज लिमिटेडसँग सन् २०१९ को मार्चमा ठेक्का सम्झौता भएको विद्युत् प्राधिकरणका कार्यकारी निर्देशक कुलमान घिसिङले जानकारी दिए । “हाल भइरहेको जमिनमाथिको (ओभरहेड) वितरण प्रणालीभन्दा भूमिगत प्रणाली सुरक्षित छ, यो भरपर्दो पनि छ । यसले हाल विद्युत् आपूर्तिमा देखिएका समस्याहरु समाधानका लागि पनि सहयोग पु-याउँछ,” उनले भने, “हामीले विद्युत्को थप मागलाई सम्बोधन गर्ने गरी निर्माण अघि बढाएका छौं ।”
भूमिगत वितरण प्रणाली भएपछि हावाहुरी, पानी, चट्याङ आदिको कारणले विद्युत् प्रणालीमा अवरोध नहुने तथा विद्युत् भरपर्दो, गुणस्तरीय र सुरक्षित हुँदा विद्युतीय दुर्घटनाबाट हुनसक्ने जनधनको नहुने लगायतका फाइदाहरु छन् । प्राधिकरणका उपकार्यकारी निर्देशक मनोज सिलवाल तुलनात्मक रुपमा भूमिगत विद्युत् धेरै सुरक्षित र भरपर्दो हुने भएकोले नमूना रुपमा सुरु गरिएको बताउँछन् । “भूमिगत वितरण प्रणाली तुलनात्मक रुपमा धेरै प्रभावकारी हुन्छ । वितरण प्रणाली भूमिगत गर्दा कुनै जोखिम पनि छैन । यसको कामको अनुगमनका लागि पनि हामीले परामर्शदाता समूह चयन गरेका छौं,” उनले भने ।
भूमिगत कार्य गर्दा सडकमा न्यूनतम क्षति हुने गरी परम्परागत तरिकाबाट सडक नखनी सम्भव भएसम्म होराइजेन्टल डाइरेक्सन ड्रिलिङ प्रविधि प्रयोग गरिन लागेको प्राधिकरणले जनाएको छ ।