एजेन्सी
सोमवार, मंसिर ३०, २०७६
547

वासिङ्टन-योगले मस्तिष्कलाई फाइदा पु-याउने पछिल्लो एक अध्ययनले पुनः पुष्टि गरेको छ । मस्तिष्कको विकास र कार्यक्षमता वृद्धिमा योगाले सहयोग पु-याउने देखिएको एक वैज्ञानिक अध्ययनको निष्कर्ष छ ।
‘ब्रेन प्लाष्स्टिसिटी’ एक जर्नलमा प्रकाशित उक्त अध्ययन प्रतिवेदनमा ११ प्रतिवेदन समावेश गरिएको छ ।

अध्ययनमा योग र मस्तिष्क स्वास्थ्यको अन्तरसम्बन्धलाई मुख्य रूपमा हेरिएको अध्ययनकर्ताहरूले जनाएका छन् ।
अध्ययनमध्ये पाँच अध्ययन योगको कुनै अभ्यास नै नगरेका व्यक्तिको बारेमा रहेको छ । त्यसमा उनीहरूको मस्तिष्क विकासको सुरुदेखि अन्तिमसम्मको अवस्थाको तुलनात्मक अध्ययन गरिएको छ ।
त्यसैगरी अर्को अध्ययनमा नियमित रूपमा योगा गर्ने व्यक्ति र उसको मस्तिष्कको विकासको अवस्थाका बारेमा अध्ययन गरिएको छ ।
अध्ययनका क्रममा ती व्यक्तिहरूको मस्तिष्कको एमआरआई, फङ्सनल एमआरआई वा फोटोबाट पनि मस्तिष्कको वृद्धि विकासको अध्ययन गरिएको थियो ।
“हामीले गरेको ११ ओटा अध्ययनबाट यो निष्कर्ष निकालेका छौँ कि मानव मस्तिष्कको वृद्धि विकासमा योगको महत्वपूर्ण भूमिका रहन्छ,” अध्ययनको नेतृत्व गर्नुभएका नेहा गोथेले बताए ।
‘युनिभर्सिटी अफ इलिनोइस किनेसिओलोजी एन्ड कम्युनिटी’का स्वास्थ्य प्राध्यापक नेहाले ‘वायन स्टेट युनिभर्सिटी’का मनोविज्ञान प्राध्यापक जेसिका दामोइसियक्ससँगले अध्ययनको नेतृत्व गरेका हुन् । “यससम्बन्धी धेरै अध्ययन भए पनि नियमित योग र मस्तिष्कको विकासको अन्तरसम्बन्धको गहिरो अध्ययन भएको थिएन, तर यो अध्ययनले त्यसलाई जोड दिएको छ,” दामोइसियक्सले बताए ।
नियमित योग गर्नाले दिमागको सक्रियतालाई व्यवस्थित गर्न सहयोग पुग्ने देखिएको अध्ययनले बताएको छ ।
योग नगर्नेभन्दा योग गर्नेको दिमाग बढी चलायमान हुने भएकाले वृद्धि र विकासमा सहयोग पुगेको अध्ययनको निष्कर्ष छ ।
“योग कुनै बाहिरी कसरत मात्रै होइन, यो त दिमाग परिवर्तन गराउने अर्कै नेतृत्वदायी संयन्त्र हो,” नेहाले बताए । तर त्यस्तो संयन्त्रको कुनै पहिचान र प्रमाण भने आफूहरूसँग नभएको पनि उनले उल्लेख गरे । योगले मानिसको तनाव व्यवस्थापन तथा न्यूनीकरण गर्न सहयोग पु-याउने आफूहरूको अध्ययनबाट देखिएको गोथेले बताए ।