कारोबार संवाददाता
आइतवार, आश्विन १२, २०७६
407

सरकारले जाजरकोटस्थित ४ सय १७ मेगावाटको नलसिंहगाड जलविद्युत परियोजना सार्वजनिक नीजि साझेदारी (पीपीपी) मोडेलमा बनाउन जापान सहयोग नियोग (जापान) सँग प्रस्ताव गरेको हो ।
जापान भ्रमणमा रहेका ऊर्जा, जलस्रोत तथा सिंचाइमन्त्री वर्षमान पुनसँगको भेटवार्तामा पीपीपी मोडेलमा परियोजना बनाउन प्रस्ताव गरेका हुन् । जाइकाका कार्यकारी उपाध्यक्ष काजुहिको कोशिकावाबीच भएको भेटवार्तामा मन्त्री पुनले नलसिंह गाड जलविद्युतमा लगानी गर्न समेत आग्रह गरेका थिए । उर्जामन्त्री पुनले जाइकाले पीपीपी मोडेलमा परियोजना अघि बढाउन आग्रह गरे ।

‘जाइकासँगको छलफल अत्यन्तै सकरात्मक भएको छ, डिपीआरको अध्ययनलगत्तै परियोजनालाई अघि बढाउने गरी पहल थाल्ने प्रतिवद्धता जनाउनुभएकोले पनि चाँडै यसले मुर्त रुप पाउनेमा म आशावादी छु ।’ मन्त्री पुनले भने । छलफलको क्रममा जाइकाका उपाध्यक्ष कोशिकावाले आफूहरु परियोजना अघि बढाउन सकारात्मक भएको बताउँदै नेपालको उर्जा क्षेत्रमा थप लगानी गर्ने प्रतिवद्धता जनाएका थिए ।
मन्त्री पुनले उक्त परियोजनालाई अघि बढाउने विषयमा बुधबार जापानका संसदीय, परराष्ट्र, उपमन्त्री नोरुहिरो नाकायामा, कृषि, वन तथा मत्स्यपालन राज्यमन्त्री योसिताका इता र जापान संसदीय मैत्री समूहका अध्यक्ष तथा लिबरल डेमोक्राटिक पार्टीका महामन्त्री तोसिहिरो निकाइसँग छलफल पनि छलफल गरेका थिए । भेटवार्तामा उर्जामन्त्रालयका सहसचिव तोया अधिकारी, नेपाल विद्युत प्राधिकरणका कार्यकारी निर्देशक कुलमान घिसिङलगायतका उच्च अधिकारी सहभागी थिए ।
भेटमा मन्त्री पुनले नेपालमा हाल पाँच वर्षका लागि स्थायी सरकार रहेको भन्दै थप लगानीका लागी आग्रह गरेका थिए । नेपालमा जलविद्युतको बजार समेत सुरक्षित रहेको र नाफा समेत सजिलै लिन सकिने अवस्था सरकारले बनाएको दावी गरे ।भ्रमणका क्रममा २५ भन्दा बढी कम्पनीका प्रतिनिधि र १ सय सहभागी भएको अन्तरक्रिया कार्यक्रममा मन्त्री पुनले जापानी लगानीकर्तालाई नेपालमा लगानी गर्न समेत आग्रहका साथै उत्पादकले चाहेमा छिमेकी देशमा बेच्ने वातावरण समेत बनाइदिने प्रतिबद्धता जनाएका थिए ।
अन्तरक्रियामा जापानमा जलविद्युतको क्षेत्रमा काम गरिरहेका तोसिबा, कान्साई, टोकियो ईलेक्ट्रोनिक्स, न्यूजेक ईलेक्ट्रोनिक्सलगायत कम्पनी सहभागी थिए । कार्यक्रमको संयोजन समेत जाइकाले गरेको थियो ।

 


सातामा धेरै पढिएको