भीम गौतम
मंगलबार, असार २४, २०७६
861

‘जनताको जलविद्युत्’को कोष प्रवन्ध गर्ने

ऊर्जा, जलस्रोत तथा सिँञ्चाइ मन्त्रालयले जलविद्युत् लगानी तथा विकास कम्पनी (एचआईडीसीएल)लाई जनताको जलविद्युत् कार्यक्रमको कोष प्रबन्धक (फण्ड म्यानेजर) को जिम्मा दिने निर्णय गरेको छ । जलविद्युत् आयोजनामा लगानी जुटाउन गठन गरिएको संस्थालाई फण्ड म्यानेजरको जिम्मा दिन लागिएको हो । कोषले स्थापनाको लक्ष्यअनुसार काम नगरेको भन्दै आलोचना भइरहेका बेला सरकारले अर्कै जिम्मेवारी दिन लागेको हो ।
ऊर्जामन्त्री वर्षमान पुनको संयोजकत्वमा रहेको कार्यक्रम कार्यान्वयन तथा समन्वय समितिको चौथो बैठकले फण्ड म्यानेजरको जिम्मेवारी एचआईडीसीएललाई दिने निर्णय गरेको हो । मन्त्रालयका सहसचिवत्रय प्रवीणराज अर्याल, तोयानाथ अधिकारी र नवीनराज सिंहका साथै अर्थ मन्त्रालयका सहसचिव उत्तरकुमार खत्री, अर्थ मन्त्रालयको वित्तीय क्षेत्र व्यवस्थापन तथा संस्थान महाशाखाका सहसचिव तोयम राय, विद्युत् विकास विभागका महानिर्देशक मधु भेटुवाल, नेपाल विद्युत् प्राधिकरणका कार्यकारी निर्देशक कुलमान घिसिङ, नेपाल धितोपत्र बोर्डका कार्यकारी निर्देशक परिष्ठनाथ पौडेललगायत सदस्य रहेको संलग्न समन्वय समितिको बैठकले सो निर्णय गरेको हो ।

जनताको जलविद्युत् कार्यक्रमअन्तर्गत ७ खर्ब बराबरको ३५ सय मेगावाटको जलविद्युत् आयोजना सरकारले अघि बढाउन लागेको छ । ७० प्रतिशत ऋण र ३० प्रतिशत इक्विटी रहने आयोजनामा २ खर्ब १० अर्ब इक्विटी लगानीमा हुनेमा त्यसको ४९ प्रतिशत अर्थात करिब १ खर्ब जनताको लगानी हुनेछ । जनताको जलविद्युत् कार्यक्रमको कार्यविधिमा सेयर रकमको व्यवस्थापनका लागि सम्बन्धित आयोजनाको आवश्यक नपर्ने भएमा सम्बन्धित कम्पनीले मन्त्रालयको स्वीकृति लिइ त्यस्तो रकम कुनै बैक वा वित्तीय संस्था वा सरकारको स्वामित्वमा रहेको एचआईडीसिएलाई व्यवस्थापनको जिम्मा दिने सकिने उल्लेख छ । ऊर्जा मन्त्रालयका प्रवक्ता अर्यालले जनताको जलविद्युत् कार्यक्रमअन्तर्गत कोष व्यवस्थापनको जिम्मा एचआईडीसिएललाई दिने निर्णय गरेको जानकारी दिए । “जनताको जलविद्युत् कार्यक्रमअन्तर्गत जनताबाट लगानी व्यवस्थापनको जिम्मेवारी एचआईडीसीएललाई दिइएको छ, जनताबाट पैसा उठाउने लगायतका काम त्यो निकायबाट हुन्छ,” उनले भने । मन्त्रालय स्रोतका अनुसार, समन्वय समितिले निर्णय गरेकोले अब एचआईडीसीएलले स्वीकृतिका लागि आवश्यक प्रक्रिया अघि बढाउनेछ । बैंकर अनलराज भट्टराई भने सरकारले निर्णय गरेपछि एचआईडीसीएलले संक्रमणकालीन अवस्थामा कोष प्रबन्धकको जिम्मेवारी लिनसक्ने बताउँछन् ।
एचआईडीसीएलले जलविद्युत् लगानी तथा विकासका लागि विभिन्न आयोजनाहरूमा लगानी गर्नुका साथै स्वपुँजी (इक्विटी) लगानी गर्दै आएको छ । कम्पनीका प्रमुख कार्यकारी अधिकृत छविलाल पोखरेल राष्ट्र बैंकसँग कोष व्यवस्थापनको लागि स्वीकृति लिइएको र निर्णयपछि कार्यविधि बनाएर कोष व्यवस्थापन गर्ने बताए । “अब कार्यविधि बनाएर कम्पनीले कोष प्रबन्धकको भूमिका पनि निर्वाह गर्नेछ,” उनले भने ।