कारोबार संवाददाता
मंगलबार, पुष ११, २०७४
931

संघीय मामिला तथा स्थानीय विकास मन्त्रालय, केन्द्रीय आयोजना कार्यान्वयन इकाइअन्तर्गतको भूकम्पीय आवास पुनर्निर्माण आयोजनाले स्थानीय निकायका वडाध्यक्ष, वडासचिव, प्राविधिक लगायतलाई पुनर्निर्माणबारे जानकारी दिन सुरु गरेको छ ।
भूकम्पबाट प्रभावित ३१ जिल्लाका २८२ स्थानीय तहका वडाध्यक्ष, वडासचिव र प्राविधिकहरूलाई भूकम्पपछिको पुनर्निर्माणमा संलग्न विभिन्न निकाय, तिनको जिम्मेवारी एवं पुनर्निर्माणसँग सम्बन्धित कार्यविधिका विषयमा जानकारी दिन सुरु गरेको हो । अभिमुखीकरण एवं अन्तरक्रिया कार्यक्रममार्फत पुनर्निर्माणबारे जानकारी दिनका लागि सुरु गरिएको आयोजना निर्देशक इश्वरचन्द्र मरहट्टाले जानकारी दिए । उनका अनुसार सोमबार रसुवाको पार्वतीकुण्ड गाउँपालिकाबाट सुरु भएको कार्यक्रम सबै स्थानीय तहमा पुगी माघ मसान्तभित्र सक्ने लक्ष्य राखिएको छ ।

स्थानीय विकास मन्त्रालयका अनुसार, पहिलो चरणमा भूकम्पप्रभावित ११ जिल्ला रामेछाप, सिन्धुली, नुवाकोट, लम्जुङ, पाल्पा, म्याग्दी, दोलखा, धनकुटा, चितवन, रसुवा र सिन्धुपाल्चोकमा अभिमुखीकरण कार्यक्रम हुनेछ । जिल्लामा कार्यक्रम सञ्चालन गर्न ११ वटै टोली जिल्लातर्फ परिलाचन भएको मन्त्रालयले जनाएको छ । कार्यक्रमबाट केन्द्र र स्थानीय तहबीचको दूरी कम हुने, निजी आवास पुनर्निर्माण कार्यले तीव्रता पाउने एवं पुनर्निर्माणसँग सम्बन्धित विभिन्न कार्यविधि र प्रक्रियाका बारेमा जनप्रतिनिधिमा रहेको अन्योलता चिर्न सफल हुने आयोजनाको अपेक्षा छ ।
आयोजनाका अनुसार, हालसम्म पहिचान भएका कुल ७ लाख ६७ हजार ७ सय ५ प्रभावितमध्ये ६ लाख ७६ हजार ८४९ प्रभावितसँग अनुदान सम्झौता भएको छ । सम्झौत भएकामध्ये हालसम्म ६ लाख ६४ हजार ६४४ लाभग्राहीले पहिलो किस्ता लिए पनि दोस्रो किस्ता लिनेको संख्या भने १ लाख १५ हजार मात्र छ ।