कारोबार संवाददाता
शुक्रवार, आश्विन ३, २०७६
303

बेडिङ म्यानेजमेन्ट तथा मोडलिङसम्बन्धी काम गर्दै आइरहेको ढाका इभेन्ज कम्पनीले ढाका कपडाको प्रवद्र्धन गर्ने र यसको मौलिकतालाई विश्वस्तरमा चिनाउने उद्देश्यका साथ ‘ढाका रन वे ब्राइडल शो’ को आयोजना गर्ने भएको छ ।
यही असोज ११ गते हुने उक्त फेसन शोमा नेपालका चर्चित डिजाइनर मनिष राई, मुक बुटिक (मुक्ता श्रेष्ठ), अर्बन भोग नेपाल (प्रफुल रिजाल, भारती आचार्य), विजय गौतम, मर्सल माश्सलले आफ्नो कलेक्सन-पहिरन तथा डिजाइन देखाउने पनि आयोजकले बुधबार रिपोर्टर्स क्लब नेपालमा पत्रकार सम्मेलनको आयोजना गरेर जनाएको छ ।

काठमाडौंको कुपण्डोलस्थित म्याक्सिम बैंक्वेटमा हुने उक्त फेसन शोमा ३५ जना मोडलले सहभागिता जनाउने पनि आयोजकले जनाएको छ । उक्त शोमा नायिका, मोडल तथा गायिका परमिता आरएल राणा, मोडल सबिता कार्की, मिस नेपाल अश्मी श्रेष्ठ, नायिका करुणा श्रेष्ठ, नायिका तथा मोडल सिर्जना रेग्मीको विशेष उपस्थिति रहने र अन्य प्रस्तुतिहरू पनि समावेश गरिएको कम्पनीका क्रिएटिभ डाइरेक्टर अजय गुरुङले जानकारी दिए । परमीता आरएल राणा ढाका इभेन्ज कम्पनीकी ब्रान्ड एम्बेसडर पनि हुन् ।
उनकाअनुसार उक्त शो जम्मा ५ घण्टा चल्नेछ । शोमा सहभागिता जनाई नेपाली ढाका कपडाको प्रवद्र्धन र ढाका प्रयोगमा प्रोत्साहनमा सहयोग गर्न पनि आयोजकले अपिल गरेको छ । उक्त शोको उद्घाटन भने नेपाली कांग्रेसकी नेतृ तथा सांसद पार्वता डिसी चौधरीले गर्ने पनि आयोजकले जनाएको छ ।
पत्रकार सम्मेलनमा आयोजकको तर्फबाट क्रिएटिभ डाइरेक्टर गुरुङसहित सीईओ रिषत रेमन, प्रवन्ध निर्देशक दीक्षा चौधरी र बजार निर्देशक आशिष श्रेष्ठको सहभागिता थियो ।